અત્ર તત્ર સર્વત્ર વ્યાપ્યો, પણ અદ્શ્ય છે સાવ.
સદીઓની આ સંતાકૂકડી, નથી ઉતરતો દાવ..
ગોકુળ, મથુરા, દ્વારિકા દીઠાં, જમના જળમાં જોયું.
તીરથ, મંદિર, કથા, કીર્તન, ક્યાંયે મન ના મોહ્યું.
યશોદા, રાધા ક્યાંય ન દીસે, કોને કરવી રાવ? સદીઓની આ…
હોમ, હવન, જપ અને તપ, ધરમ, ધ્યાન બહુ કીધાં
ગીતા, ભાગવત, પુરાણ, સ્તુતિ, સઘળાં વાંચી લીધાં
થાકી, હારી એને જ કીધું, કાંઈક મારગ બતાવ… સદીઓની આ…
મલકી કાનો કહેતો મને, કાં ઠાલા ફાંફા મારે?
મને ગોતવો સાવ સહેલો, ભેદ એ ઓછા જાણે.
જરાક ઝુકાવ માથું અને જો, પાસે જ છું હું સાવ..
સદીઓની સંતાકૂકડીનો, પળમાં ઉતરે દાવ…